No mes de abril, co gallo da semana cultural, a escritora Mª Xosé Queizán visitou a biblioteca escolar do IES de Ponteceso. Unha biblioteca que hai que ver e que conta -entre outras actividades- cun dinámico club de lectura. Algo debeu "notar" a coñecida autora e feminista, cando poucos días despois publicou o seguinte artigo no xornal A Nosa Terra.
"Os centros de ensino son lugares que poñen o saber ao servizo da sociedade. O pensamento, a arte e a ciencia son a mellor garantía para o progreso da humanidade. O ensino público é o nivelador social, o gran logro da democracia porque facilita os coñecementos para toda a poboación, á parte do sexo ou da clase social. A calidade do ensino público nun país asegura un futuro de benestar e unha cidadanía consciente, culta e feliz. Por iso quero mostrar a miña satisfacción ante a mellora dos centros de ensino en Galicia. Estou dando conferencias en diversos institutos que me deron optimismo. Encontrei centros ben dotados, limpos, con plantas, e falei para un alumnado de Bacharelato atento, correcto, cun comportamento cívico que bota abaixo esa idea dunha mocidade actual maleducada e díscola. O nivel de educación non só depende dos investimentos económicos, que tamén, senón das actividades humanas, dunha dirección adecuada e dun profesorado dedicado, culto e imaxinativo. Falo, por exemplo do IES de Ponteceso onde reflexionei sobre a Guerra e Paz para un auditorio xa sensibilizado. Fixéronme unha entrevista nunha radio “pirata” que manexa un estudante de 3º de ESO. Obsequiáronme con dúas unidades didácticas sobre a cultura da paz e a convivencia, elaboradas por un amplo sector do profesorado, con fotografías nas que o propio alumnado reproduce escenas de tortura, de mutilación por minas, de violencia de xénero, de éxodo de refuxiadas, acoso escolar, da homofobia. Non aprenden de oídas; implícanse, métense na pel da xente que sofre. Este ensino promete un excelente futuro."
María Xosé Queizán
No hay comentarios:
Publicar un comentario