26/12/12

Adopcións de libros e outras fórmulas para o fomento da lectura

Nestes días de Nadal, e co fin de fomentar a lectura entre os distintos sectores da comunidade escolar, algunhas bibliotecas escolares puxeron en marcha iniciativas de interese e que gardan, así mesmo, múltiples posibilidades educativas. Entre elas, destacamos esta campaña do CEIP Frián-Teis, de Vigo, baixo o título ADOPTANDO LIBROS POLO NADAL, na que rapazas e rapaces escollen un libro da biblioteca para "adoptalo" e levalo a seus pais como lectura para o Nadal. O proceso conleva unha serie de actividades que, entre outras cousas, serven para a formación do alumnado como lectores e usuarios da biblioteca. Pódese ver coñecer a fondo esta iniciativa no blogue da biblioteca do centro.

Pola súa parte, o IES As Mariñas, de Betanzos, tamén levou a cabo (por terceiro ano consecutivo) a súa campaña de Nadal baixo o lema: Na biblioteca un agasallo para ti. As mozas e os mozos que queiran poden elixir un libro para "agasallar" a algúen da súa familia. Fan o préstamo ao seu nome e a biblioteca encárgase de preparalo "bonito" para que ese préstamo-agasallo sexa algo especial. O éxito dos anos anteriores fíxolles repetir e este ano preparáronse 191 "agasallos", 191 préstamos especiais para o Nadal.

E as nenas e nenos do CEIP de Leirado (Salvaterra do Miño, Pontevedra) poden levar á casa un préstamo especial, escollendo libros, cine ou música para toda a familia, na campaña ALIMENTA AS TÚAS VACACIÓNS, e utilizar unha bolsa especial que a biblioteca proporciona a tal fin. Toda unha campaña de marketing cultural que ten, tamén, as súas implicacións formativas e que procura a implicación dos propios lectores no contaxio do hábito lector (vídeo. 

Tamén no IES Ribeira do Louro (O Porriño) houbo "campaña de Nadal". Nesta ocasión, o equipo de biblioteca preparou "pacs" de libro+película e ofrecéronno para o préstamo de Nadal.

Un cento de recomendacións de lectura para o Nadal

Reproducimos a felicitación do Nadal remitida pola biblioteca do IES de Poio para esta entrada dedicada ás recomendacións de lectura elaboradas desde as bibliotecas escolares galegas. Máis dun cento de "guías de lectura", cada unha delas froito da experiencia, da dedicación, do esforzo e do bo facer e entender do profesorado que constitúe os equipos de biblioteca dos diferentes centros e que, exercendo a súa función de orientación e de mediación, as ofrecen á comunidade escolar correspondente mentres, a través da rede, as comparten con todos nós. Pódense ver AQUÍ

21/12/12

Montañas coma illas... de libros.


Desde a Biblioteca do Porviso, do CPI dos Dices (Rois, A Coruña), achégannos este vídeo que documenta a elaboración dunha "árbore de Nadal" que medra grazas ao esforzo colectivo e que chama á lectura.

"Qualsevol nit pot sortir el sol"

Grazas á biblioteca do IES Pedras Rubias (Salceda de Caselas, Pontevedra) recuperamos este fermosísimo vídeoclip realizado sobre a canción de Jaume Sisa "Qualsevol nit pot sortir el sol", tan oportuna. O xogo sería facer unha lista coas personaxes do imaxinario literario actual que habería que engadir.

17/12/12

Lecturas para o Nadal nas bibliotecas escolares

DomoNation.com: Un libro no Nadal by quinif


Desde o CEIP Condesa de Fenosa (O Barco, Ourense) achégannos esta animación que chama a coller en préstamo libros da biblioteca escolar para o Nadal. E non vai ser por falta de libros. Velaquí tamén as recomendacións de lecturas que fan as bibliotecas escolares galegas:

12/12/12

No Xograr os libros ... "dan de comer"

No IES Xograr Afonso Gómez de Sarria (Lugo)  botaron a andar unha iniciativa solidaria asociada ao fomento da lectura na propia biblioteca do centro. Trátase dunha campaña de recollida de comida non perecedeira, á que ten que acompañarse unha recomendación ou recensión dun libro lido. No blogue da biblioteca pódese coñecer máis polo miudo esta iniciativa que se une a outras anteriores, doutros centros, semellantes nos fins solidarios aínda que diversas en fórmulas e contido.

4/12/12

Os videoxogos na biblioteca escolar, outro formato.

As IV Xornadas de Bibliotecas Escolares de Galicia, celebradas en Compostela os días 9 e 10 de novembro de 2012, organizadas pola Consellería de Cultura, Educación e Ordenación Universitaria, acolleron unha interesante, animada e impactante sesión sobre os videoxogos na biblioteca escolar, coa presenza de Marian Moreno, profesora e asesora do CPR de Avilés, experta en videoxogos e coeducación, e Isidora Gil, responsable da biblioteca do IES de Celanova.

DiarioKafka, espazo cultural do xornal dixital eldiario.es faise eco desta sesión e do seu contido. O autor, Antonio J. Gil, é profesor da Universidade de Santiago e experto en videoxogos: Los videojuegos en la biblioteca.

3/12/12

Eu son un "ser libris"


Ser Libris from Illa Bufarda on Vimeo.
Fermosa iniciativa de Illa Bufarda para a Asocaciación Galega de Editores, presentada co gallo do Culturgal, nestes pasados días. Afortunado descubrimento dese estraño animal, o "ser libris". 

26/11/12

#recitandoacelsoemilio


Deitado frente ao mar I from Seso Durán on Vimeo.
A Coordinadora Galega de Equipos de Normalización e Dinamización Lingüística lanzou hai un tempiño unha proposta aos centros para rematar o "ano Celso Emilio Ferreiro", no que se cumpren os cen anos do nacemento do poeta de Celanova. 

Segundo esta iniciativa, o día 12 do 12 ás 12, os centros que se sumen a ela lembrarán o poeta recitando un dos seus textos máis coñecidos, tamén máis actual na súa mensaxe: Deitado frente ao mar

Desde o IES As Barxas (Moaña, Pontevedra) colaboran ademais cun vídeo para a promoción desta iniciativa, que dá conta do nivel que acadan as producións audiovisuais que se están a facer nos centros.

A biblioteca do IES Concepción Arenal (Ferrol) achega un material moi completo sobre a figura de Celso Emilio Ferreiro.

"Un lector". Blogue de Agustín Fernández Paz

Agustín Fernández Paz é un dos autores máis lidos por nenos e nenas, mozas e mozos deste país e de algúns outros aos que chegan as traducións dos seus libros. É un privilexio poder contar coa súa presenza tamén na Rede. Impecable a súa páxina: http://agustinfernandezpaz.eu/ na que podemos acceder a datos biográficos, relación das súas obras, textos diversos sobre lingua, lectura ou bibliotecas (na sección de "ensaios") e noticias sobre el e a súa obra na prensa, como o recente nomeamento como Doutor Honoris Causa que lle concede a Universidade de Vigo, un máis dos múltiples recoñecementos que este autor está a recibir por todo o país. 
Desde esta páxina, tamén podemos acceder ao blogue de Agustín, ao que titula UN LECTOR e no que vai achegando textos belísimos sobre cousas que lle interesan moito: os libros, os cómics e o cinema. A última entrada neste blogue está dedicada a un libro e a unha película ben especiais: O festín de Babette

Outro espazo de acceso á obra de Agustín Fernández Paz é a páxina que lle dedica a Biblioteca Virtual Miguel de Cervantes, na sección de Literatura Infantil y Juvenil: http://www.cervantesvirtual.com/portales/fernandez_paz/



26/10/12

Celebrando o Día da Biblioteca Escolar... compartindo lecturas!!!


As bibliotecas escolares galegas celebraron a apertura do curso con distintas actividades pero cando chega o 24 de outubro, Día da Biblioteca, hai que poñerse "serios" e demostrar que a lectura é un valor e que a biblioteca é un espazo imprescindible para medrar como lectores. E no CEIP Saco e Arce  de Toén (Ourense) tivérono claro: 
Como lles gusta aos nenos que lles lean!
 E como lles gusta aos maiores lerlles aos pequenos! 
O día da Biblio volvemos a poñer en marcha o "apadriñamento" lector.
Tanto éxito ten esta actividade, que os días seguintes, sen que ninguén dixese nada, nos recreos os "pequenos" achegabanse a biblio para que os "maiores" lles lesen.
 E os maiores buscaban aos pequenos nas  súas aulas para ofrecerse a lerlles o que quixesen.
 Algúns case parecían contacontos profesionais!
Non hai máis que ver estas imaxes para darse conta da profundidade coa que está calando a lectura nestes nenos, nestas nenas. Non hai máis que mirar nos seus ollos e observar a súa xestualidade... 

1/10/12

IV Xornadas de bibliotecas escolares de Galicia

As IV Xornadas de Bibliotecas Escolares de Galicia celebraranse os vindeiros 9 e 10 de novembro, en Santiago de Compostela (Palacio de Congresos). O lema destas xornadas é LER PARA VER, e van estar adicadas á alfabetización mediática e informacional, aos medios de comunicación e a lectura crítica dos contidos audiovisuais, entre outros.

17/9/12

De zona de paso... a recuncho de lectura



 
Desde o IES Poeta Añón (Outes, A Coruña), chéganos este vídeo que documenta o proceso de transformación dunha zona de paso nun espléndido recuncho de lectura, coa colaboración da rapazada e do Departamento de Plástica do centro: un orzamento mínimo, algún moble reciclado e unha gran dose de imaxinación e ghanas... Gañar espazos para a lectura, unha forma de "mediar" e facilitar que os rapaces e rapazas se sintan a gusto nesa actividade, que é a única forma de habituarse á lectura...  Parabéns por esta iniciativa e grazas por compartila!!

13/9/12

10 propósitos para o novo curso, compartidos


Non se podería resumir mellor...  velaquí unha presentación con 10 propósitos para o novo curso, atopada en Gramática Parda, do profesor andaluz  Aitor Lázpita,

12/9/12

Unha vida entre libros. Ana María Machado



Conferencia de Ana María Machado, na apertura do Congreso Iberoamericano de las Lenguas en la Educación y La Cultura - IV Congreso Leer.es (Salamanca, 5, 6 e 7 de Setembro de 2012)

Hora de ler, un programa para o fomento da lectura.

Salamanca acolleu os pasados 5, 6 e 7 de setembro o Congreso Iberoamericano de las Lenguas en la Educación y la Cultura - IV Congreso Leer.es, organizado conxuntamente pola OEI (Organización de Estados Iberoamericanos para la Educación, la Ciencia y la Cultura) e o Ministerio de Educación, Cultura e Deporte. A lectura e os lectores estiveron moi presentes en mesas redondas, conferencias e comunicacións. A páxina do congreso está dando acceso a todos os materiais. As bibliotecas escolares galegas estiveron presentes, entre outras, a través das persoas responsables da Asesoría de bibliotecas escolares, que presentaron dúas comunicacións: Bibliotecas Escolares de Galicia, aceleradores de innovación, e estoutra, máis centrada nas accións que para o fomento da lectura se levan a cabo nos centros escolares, co apoio da Consellería de Educación, a través do programa HORA DE LER:

4/9/12

Convocatoria de axudas para Clubs de Lectura. Curso 2012/2013

Club de lectura. IES Pedra da Aguia. Ponte do Porto-Camariñas

Ata o 15 de outubro está aberto o prazo para a presentación de solicitudes de axuda para o funcionamento de clubs de lectura no curso 2012/2013, para centros públicos que matriculan alumnado de ensino secundario, bacharelato, formación profesional ou ensinanzas de réxime especial. Hoxe, 4 de setembro, publícase no Portal Educativo a convocatoria da Dirección Xeral de Centros e Recursos Humanos que regula a concesión destas axudas.

No curso 2011/2012 houbo un total de 217 centros que tiveron clubs de lectura en funcionamento, con apoio desta iniciativa da consellería, encadrada no programa HORA DE LER para o fomento da lectura en centros de ensino.

4/7/12

Unha gándara de libros

"Existe un libro de maxia titula "O Ciprianillo" no que se din os lugares de toda Galicia onde os mouros deixaron enterrados os seus tesouros, algúns son grandes tesouros e outros teñen menos valor. E nese libro dise o seguinte: "Deixamos un tesouro de pouco valor na quebradas das Gándaras. As pedras que a cercan cheiran a xofre". Pois ben, o que non sabía Cipriano ao escribir isto é que moitos anos máis tarde nas Gándaras, que soen ser terreos baixos, areentos e pouco produtivos onde só medra a maleza... nese lugar infértil agóchase agora outro tesouro, un tesouro moi valioso: só hai que entrar no Colexio, abrir unha porta ao fondo dun corredor e aló poderase ver un tesouro custodiado pola maga Sara e os seus e as súas axudantes. Cada libro fala de ti. Cada libro é unha parte do teu tesouro. Felicidades a todos e a todas por facer dun terreo infértil unha gándara de vida, unha gándara de libros". Olga Novo

Texto extraído do discurso da poeta Olga Novo na inauguración da Biblioteca do colexio CEIP A Gándara, en Monforte de Lemos, o 31 de maio de 2012.

"Ler non é clandestino"

 
Desde a biblioteca do IES Chano Piñeiro, de Forcarei (Pontevedra) chéganos esta versión afortunada do tema de Manu Chao, "Clandestino". LER NON É CLANDESTINO anuncian os mozos e mozas deste instituto de ensino público do rural galego. Parabéns pola idea, pola versión e pola edición deste vídeo. Parabéns tamén polo traballo que hai detrás a prol da lectura. .

26/6/12

V Xornada dos Clubs de lectura



O 9 de xuño de 2012 reuníronse en Compostela máis de 400 lectores e lectoras na V Xornada dos Clubs de lectura, convocados pola Consellería de Cultura, Educación e Ordenación Universitaria. Os asistentes eran todos integrantes dos clubs de lectura existentes en 215 centros educativos de ensino secundario de Galicia no curso 2011/2012, e que recibiron axudas en virtude dunha convocatoria da Dirección Xeral de Centros e Recursos Humanos, no contexto do programa HORA DE LER, para o fomento da lectura nos centros de ensino. Participaron os profesores e profesoras que coordinan estes clubs e unha representación de alumnos e alumnas que participan nos diferentes clubs, así como nais e pais ou persoal non docente que forman tamén grupos de lectura de adultos nalgúns dos centros.

Este vídeo resume un pouco o que alí pasou.

20/6/12

Emili Teixidor

"Contaxiar o desexo de ler é como contaxiar calquera outra convicción profunda: só se pode conseguir, ou mellor intentar, sen imposicións, por simple contacto, imitación ou seducción. Non se trata de encher ningún vaso –cerebro- baleiro, senón de prender nunha silveira o lume que nos axita. Polo simple contacto dunha chama. O mellor contaxio/contacto é o exemplo”.

Na tarde de onte, 19 de xuño, coñecíamos a nova da morte de EMILI TEIXIDOR, unha das persoas máis comprometidas co fomento da lectura neste país, a través da súa obra e a través do seu exemplo. Estivo connosco en novembro de 2006, nos I Encontros de Bibliotecas Escolares de Galicia, e coas palabras que reproducimos resumía a súa intercención. Foi un privelexio coñecelo e disfrutar da súa palabra.  Afortunadamente, quédannos os seus libros. Recomendamos, para os mediadores, LA LECTURA Y LA VIDA (Ariel, 2007).

24/5/12

A lectora de portugués, tamén conta!

A presenza de lectores ou lectoras de idiomas nos centros é unha oportunidade que se pode aproveitar tamén para ampliar o espectro das lecturas que ofrece a biblioteca. Así o entenderon no CEIP A Sangriña, de A Guarda (Pontevedra), unha poboación xa moi próxima a Portugal. Neste centro contan cunha lectora de portugués que se prestou para narrar un conto neste idioma aos nenos e nenas de infantil. Así nolo contan no seu blogue e nós difundímolo porque é unha práctica de interese que ben pode inspirar outras iniciativas. Parabéns ao profesorado implicado, e parabéns aos nenos e nenas que puideron disfrutar do conto A QUE SABE A LÚA con outros matices. 

22/5/12

Curtas de conto I - CEIP Santiago Apóstolo, de Mugardos

 
Froito da colaboración entre a Secretaría Xeral de Política Lingüística, a Dirección Xeral de Educación, Formación Profesional e Innovación Educativa, a CRTVG e OQO Editora, chegou aos centros unha iniciativa de creación de curtas a partir de contos que está dando resultados sorprendentes. Velaquí unha mostra: as nenas e os nenos do CEIP Santiago Apóstolo, de Mugardos (A Coruña) recrearon desta forma o conto A Vella Lulula (Mar Pavón e Alessandra Cimatoribus). Segundo o profesorado do centro "foi laborioso, pero en ningún momento aburrido. A cantidade de cousas que estes nenos e nenas aprenderon ( e as profes tamén, xa que partimos de 0) non se poden enumerar. A satisfacción polo producto final no que todos e todas colaboraron é o mellor dos premios posibles."

NESTA PÁXINA pódese acceder ás diferentes curtas elaboradas por colexios de toda Galicia participantes nesta iniciativa.

14/5/12

Unha lección de vida no IES O Mosteirón, de Sada

O blogue A ESPERELA, da Biblioteca escolar do IES O Mosteirón (Sada, A Coruña) recolle a crónica dunha experiencia educativa en toda regra, da que participaron os alumnos e alumnas de 3º e 4ª de ESO e 1º de BAC: a visita de Martín Varela Dourado, deportista, especialista en ténis en cadeira de rodas. Non hai máis que ler esta crónica, ver o vídeo e sobre todo, LER OS COMENTARIOS dos mozos e das mozas que asistiron á charla de Martín, para entender o alcance desta actividade. Parabéns ao profesorado que o fixo posible!!!

Unha mostra máis do que está pasando en institutos públicos de Galicia, contra vento e marea... ensino público de calidade!

11/5/12

Lecturas compartidas desde o IES Sanxenxo, veteráns...

Os mozos e mozas do IES Sanxenxo (Sanxenxo, Pontevedra), levan xa tres anos con esta experiencia de lecturas compartidas coas nenas e nenos de centros próximos. O CEIP de Dorrón, do CEIP A Florida e do CEIP de Portonovo, todos do concello de Sanxenxo, recibiron a visita das súas madriñas e dos seus padriños de lectura e viviron momentos gratos cun libro como intermediario. Non hai máis que velos! 

7/5/12

¿Cando foi a última vez?

 
Nova entrega da campaña de fomento da lectura do IES LAMA DAS QUENDAS, de Chantada (Lugo). Parabéns por implicar á comunidade, por contar coa xente, e aproveitar a retranca, o humo propio, esa sabedoría...

Canapés literarios no CEIP A Pedra, de Bueu

Desde o CEIP A Pedra (Bueu, Pontevedra) chégannos noticias doces: OS CANAPÉS LITERARIOS, unha actividade de fomento da lectura das que "abren" as gañas de ler. + Información AQUÍ

2/5/12

Recomendacións de lectura desde o IES Ribeira do Louro (O Porriño)

+ Apadriñamentos lectores, desta vez no Porriño

As mozas e mozos do IES Ribeira do Louro, de O Porriño (Pontevedra) tamén exercen de madriñas e padriños de lectura, desta vez co alumnado do CEIP Antonio Palacios, do mesmo concello, coa colaboración da Biblioteca Escolar deste centro e da Biblioteca Pública Municipal. Parabéns por esta iniciativa que, máis aló dos beneficios en relación coa lectura de grandes e pequenos, promove actitudes de convivencia e de cidadanía. Das competencias e habilidades que se poñen en xogo neste tipo de actividades, poderíase falar moito tamén... unha vez máis, educación integradora, educación de calidade no ensino público galego. 

APADRIÑAMENTO LECTOR 2012 on PhotoPeach

Ladaíña para a lectura

No CEIP Lois Tobío (Viveiro, Lugo) elaboraron, coa participación conxunta de todo o alumnado do centro, esta LETANÍA PARA A LECTURA, un exercicio de escritura creativa ao servizo da lectura. 
Por outra parte este centro xunto con outros seis do concello de Viveiro, coa colaboración do propio concello, veñen de realizar unha exposición conxunta titulada DE ONTE A HOXE, LEMBRANDO O PASADO, coa participación das familias.

30/4/12

Os mozos e mozas do IES Poeta Díaz Castro de Guuitiriz van ler polas escolas próximas...

 
Un  ano máis, os mozos e mozas de ESO do IES Poeta Díaz Castro (Guitirz, Lugo) aproveitan o Día do Libro para visitar colexios próximos (Lagostelle, Parga, A Castellana) e facer unha intervención lectora coas nenas e nenos de Infantil e 1º Ciclo de Primaria. No seu blogue podemos ler o proceso de preparación, ver un vídeo sobre a actividade e moitas fotografías.
 
Outro ano máis celebramos o día do libro compartindo contos e lecturas cos pequenos dos colexios de Lagostelle, Parga e A Castellana. Escollemos, coa axuda dos profesores dos colexios, unha serie de contos axeitados para cada nivel (infantil e 1º ciclo de primario) e distribuímos os contos entre os nosos alumnos. Durante a semana anterior cada lector preparou o seu conto tendo en conta a idade á dos nenos que o ían escoitar. Nos colexios organizamos os pequenos en grupos de tres de xeito que cada un dos lectores foi pasando por diferentes grupos e lendo o seu conto. Cremos que non resultou mal e que foi unha boa experiencia para os nosos alumnos.
 
 Parabéns por esta iniciativa.

Recomendacións musicais no IES Pino Manso, de O Porriño

 
Libros na Aula de Música, música na Biblioteca... Mozas e mozos do IES Pino Manso (O Porriño, Pontevedra) recomendan (á súa maneira) libros de ópera que veñen de ler coa guía do profesorado de Música. Esta iniciativa exemplifica unha nova vía de colaboración entre áreas de aprendizaxe e biblioteca, cando se traballa para a mellora das competencias básicas do alumnado. 
A expresión oral é unha das habilidades nas que cómpre incidir co alumnado actual, neste momento en que a linguaxe correcta non é un valor en alza nos medios de comunicación nin nos grupos sociais nos que acostuman a moverse. Bó é que o centro educativo poña toda a súa imaxinación e todos os seus medios para enfrentar un aspecto básico da competencia en comunicación lingüística. Os libros, en toda a súa variedade, poden ser bos instrumentos para traballar neste ámbito.

27/4/12

As familias e a biblioteca escolar, unha colaboración afortunada.

A importancia da implicación das familias na formación dos novos lectores e da novas lectoras é unha cuestión incontestable. Xa en 2007 a, daquela, Consellería de Educación e O.U., editaba uns materiais destinados á busar a complicidade de pais e nais nesta fermosa tarefa de contaxiar o hábito da lectura aos máis pequenos, cuns materiais incluídos no programa HORA DE LER baixo o lema ¡CONTAMOS MOITO!

Co desenvolvemento dos Proxectos Lectores de Centro nos últimos anos, son moitas as bibliotecas escolares que inclúen actividades destinadas directamente ás familias ou nas que estas teñen total protagonismo. Nestes días, e co gallo da celebración do Día Mundial do Libro, chégannos noticias de varias destas actividades, que pola súa diversidade e polo seu interese, salientamos aquí: 


24/4/12

Lecturas compartidas, apadriñamentos/amadriñamentos lectores...


Unha forma de celebrar o Día do Libro: compartindo lectura. O CEIP de CERVO (Cervo, Lugo) leva xa algúns cursos poñendo en práctica unha experiencia que canto más se práctica, máis engancha nos rapaces: as lecturas compartidas, os apadriñamentos lectores,. Os grandes len para os pequenos e así, ademais de mellorar as súas competencias comunicativas, vincúlanse aos outros, practican iso tan necesario que é o coidado do máis feble, e medran como cidadáns (ou cando menos inténtase, que xa é algo).

Son moitos os centros educativos galegos que realizan este tipo de actividades, cada vez máis. Iremos engadindo testemuñas disto, pero polo pronto, velaquí os rostros dunhas nenas, duns nenos, que se acompañan na lectura. Non hai moito que explicar. Parabéns á comunidade educativa por estas iniciativas, educación de calidade no ensino público, sen paliativos.

Tamén houbo lecturas compartidas en:

"Para un ambiente de lectura na escola"

Os mediadores de lectura, o profesorado e as familias que acompañan aos novos lectores na súa formación como tales, son imprescindibles. Tamén o é o papel da biblioteca escolar en canto fornecedora de recursos, pero tamén como xeneradora de actividades que permiten esa lectura "acompañada", que vincula aos libros e ao feito lector. A imaxe amósanos a un grupo de mozos e mozas do IES Leiras Pulpeiro, de Lugo, nunha sesión do club de lectura do seu centro. Un bo exemplo do que reclama o texto "Para un ambiente de lectura na escola", que se vén movendo estes días pola rede e nos medios escritos, a instancias de Luis Arizaleta (Navarra), persoa comprometida persoal e profesionalmente coa difusión dos beneficios da lectura, desde hai xa moitos anos. Engadimos aquí o enlace á tradución realizado por Emilio Roca, do IES Pedra da Aguia, de Camariñas.

23/4/12

Día Mundial do Libro 2012

"Din que todas as persoas necesitamos as historias, tanto coma a auga que bebemos, tanto coma o pan de cada día. Que sorte, que sexan tan doadas de conseguir! Só hai que abrir un libro e deixarse arrastrar polo río das palabras, esas que fan nacer dentro de nós outros mundo e outras vidas".

Así comeza o texto OS RÍOS DA VIDA co que Agustín Fernández Paz agasallou ás Bibliotecas Escolares de Galicia, co gallo do Día Mundial do Libro, e que se publica nun marcapáxinas para conmemorar esta data no ano 2012.

Son moitas as actividades que se están a programar estes días nas bibliotecas escolares de todo o país. Neste enlace pódense consultar e confirmar así a variedade de propostas que se realizan, coa participación dos distintos sectores da comunidade educativa.  

16/4/12

"Os meus contos favoritos"

 
As nenas e os nenos de 1º de Primaria, do CEIP Quintela (Moaña, Pontevedra) recomendan o seu libro favorito. Unha actividade que pretende non só fomentar a lectura, senón tamén traballar a expresión oral. O profesorado valora a necesidade de seguir traballando este aspecto, e a oportunidade de seguir ofrecendo libros de calidade, a pesar de que ás veces, non se correspondan as recomendacións da biblioteca cos "favoritos" dos lectores.

2/4/12

Rosca con poesía

Desde o CRA de Ribadumia, un Centro Rural Agrupado da localidade de Ribadumia (Pontevedra), chéganos unha proposta ben intereseante, dirixida aos padriños e madriñas para estas datas nas que se acostuma agasallar aos pequenos con doces de Pascua. Desde a biblioteca deste centro convidan a incorporar a poesía no agasallo e fanno a través da súa guía de lectura, ROSCA CON POESÍA, unha selección de títulos que chaman a compartir versos e descubirir o ritmo e a musicalidade das palabras.

27/3/12

Owly & Wormy


Unha historia que salta do papel ao soporte audiovisual e que, como mínimo, fará aflorar algún sorriso... inda que pode espertar moitas máis cousas...

29/2/12

Concurso de "blogs" de lectoras e lectores: ¿Que estás leyendo?

A OEI (Organización de Estados Iberoamericanos) vén de convocar un concurso de blogs de lectores, destinado a mozos e mozas de 12 a 15 anos, co fin de crear redes de lectores de distintos países e culturas.  

Para darlle publicidade e soporte a este concurso, iniciou a súa andaina a páxina que leva o nome do certame, questasleyendo.org, na que se pode acceder ás bases da convocatoria e a outras informacións.

Para motivar a participación no concurso, podemos ver na sección VOCES os vídeos de lectoras e lectores de diversos países, que nos falan do que están a ler e doutros aspectos relacionados cos libros e o fenómeno da lectura. A lingua galega está presente neste foro na voz de varias persoas, entrevistadas polos rapaces do CPI dos Dices-Rois, que colaboraron de forma entusiasta baixo a dirección do seu profesor Luis Aldegunde, e nas voces dos rapaces e rapazas (tamén de profesores), do propio CPI Dices-Rois (do club de lectura As Pintoras Daltónicas), do IES Fontem Albei, de A Fonsagrada, e do IES As Barxas, de Moaña.

Os entrevistados:

17/2/12

Con quen o fas? Campaña de lectura no IES Lama das Quendas

 
A biblioteca do IES LAMA DAS QUENDAS, de Chantada (Lugo) vén de difundir unha campaña de lectura entre o seu alumnado: "E ti,..." 
Con quen o fas? é o primeiro spot. Agardamos máis...

15/2/12

"La biblioteca en la triple matriz de la lectura"




José Antonio Millán: "La biblioteca en la triple matriz de la lectura", unha achega de moito interese no contexto da IV Jornada Profesioanal de la Red de Bibliotecas del Instituto Cervantes, celebrada en Madrid en decembro de 2011. NESTE ENLACE están dispoñibles todos os vídeos desta xornada, centrada na lectura dixital e o papel que poden desempeñar as bibliotecas entre os contidos dixitais e os lectores.

1/2/12

"Sí que te gusta leer"

A Secretaría de Estado de Cultura (Ministerio de Educación, Cultura e Deporte), está a difundir na Rede unha campaña de lectura destinada a mozos e mozas de 14 a 18 anos, baixo o lema SÍ QUE TE GUSTA LEER (pero igual no lo sabes). Cunha presentación atractiva, a páxina da campaña ofrece xogos, enlaces interesantes e un concurso para os participantes. Parte da idea de que os que afirman que non lles gusta ler, aínda así están a ler todo o día nos seus "artefactos" favoritos e nas actividades cotiás. Son lectores aínda que non lean libros. E desde aí, trata de levalos á outro tipo de lecturas. De interese para bibliotecas escolares.

27/1/12

Imprescindible Juan Mata no congreso Familias lectoras



Video streaming by UstreamOs días 21 e 22 de xaneiro, celebrouse en Granada o congreso Familias lectoras en red, organizado pola Consejería de Educación da Junta de Andalucía, en colaboración co Ministerio de Educación. Ao congreso asistiron fundamentalmente familias (pais, nais, avós lectores, nenas e nenos), e tamén profesorado procedente dos distintos recunchos de Andalucía.
A conferencia inaugural correu a cargo de Juan Mata, profesor da Universidade de Granada e unha referencia fundamental no ámbito da formación lectora e do fomento da lectura. A súa intervención é imprescindible para abordar cuestións de lectura e familia no centro escolar, para re-pensar a importancia da formación dos lectores. Recoméndase o seu visionado (a conferencia iníciase no minuto 3,30).

Lecturas pola Paz




Unha das funcións da biblioteca escolar é a de seleccionar materiais para apoiar os programas e as actividades do conxunto do profesorado dun centro. O calendario civil proporciona tamén oportunidade para visibilizar libros, películas, discos, textos dixitais... sobre un contido determinado. O Día Escolar pola Paz e da Non Violencia é unha desas datas que o profesorado aproveita para avanzar na educación en valores do alumnado, e as bibliotecas escolares para dar a coñecer materiais axeitados para a formación nunha cultura de Paz.


As bibliotecas escolares galegas difunden bancos de recursos e unhas coidadas seleccións de libros ou películas para o tratamento destes contidos. Pódense ver algúns exemplos AQUÍ