29/12/14

"Modestina quere saber" e quere que as nenas e os nenos saiban tamén...


Modestina é unha tartaruga lectora e vive na biblioteca do CEIP San Ramón, de Moeche (A Coruña). Modestina gusta de facerse autorretratos, "selfies", en distintos lugares do seu concello e propoñer un xogo ás familias. Trátase do concurso "Os selfies de Modestina" que anda a revolucionar á comunidade educativa do centro e consegue que as familias xoguen con ela a descubrir o lugar no que se fai o selfie e a buscar algunha información sobre o mesmo. Así se explica o xogo no blogue da biblioteca:

"Os selfies de Modestina" é o novo concurso da nosa tartaruga. Un reto apaixoante no cal podemos participar TODO O ALUMNADO coas SÚAS FAMILIAS. Consiste no seguinte: - Unha vez ao mes (máis ou menos) Modestina subirá ao blogue 2-3 imaxes dalgún lugar de Moeche ou dos arredores cercanos. O obxectivo é que cada familia atope o lugar da imaxe, realice un "selfie" no mesmo e resolva un par de preguntas relacionadas con el. Desta maneira poderemos coñecer algo mellor a nosa contorna (en relación co proxecto anual de centro) e pasar un tempo divertido en familia. (Vale tamén realizar calquera tipo de fotografía onde se vexa aos participantes no lugar solicitado).

Pero Modestina tamén propón outros xogos de buscas informativas ao alumnado do centro. Velaquí un exemplo das  "roldas de Modestina quere saber... ", un concurso no que participa o alumnado por equipos e que podemos coñecer tamén a través deste blogue.

18/12/14

Formación de usuarios de bibliotecas... e de librarías!



 Desde o IES Poeta Díaz Castro, de Guitiriz, chéganos esta crónica da visita dos alumnos e alumnas a unha libraría co fin de elixir e adquirir libros e películar para a biblioteca. Os "compradores" son membros do club de lectua e alumnado que acostuma participar nas actividades propostas pola biblioteca. é unha actividade "de premio" pero é tamén unha actividade educativa, planificada e útil. Así nolo conta o responsable da biblioteca, Santiago Dans:

Un ano máis os nosos alumnas e alumnos participaron na adquisición de fondos para a biblioteca. 
O pasado martes 16 fixemos un excursión ao Fnac da Coruña onde os nosos alumnos e alumnas puideron curiosear, comentar, elixir e mercar libros e películas para a nosa biblioteca. Esta actividade está dirixida ó alumnado que participa máis nas actividades da biblioteca e no club de lectura.

Escollemos unha librería grande, con bastante fondo e con espazo para podernos reunir a comentar as compras realizadas. Cada alumna dispón do mesmo presuposto para adquirir libros. Con el poden mercar un libro ou  varios, poden se xuntar cun compañeiro se non lles chega. Unha vez seleccionados os libros as rapazas terán que explicar diante de todos o motivo da súa elección, a utilidade que pode ter para os demais, etc. Trátase así de que reflexionen sobre o material que é mais axeitado para unha biblioteca  escolar e  para os seus compañeiros. Despois, xa de volta no instituto e na biblioteca cada un catalogará os libros que escolleu e poderá facer unha dedicatoria para todos os lectores. A actividade ten todos os anos unha moi boa acollida por parte do alumnado e cremos que contribúe de maneira notable a estreitar a súa vinculación coa biblioteca e os libros.

Obxectivos da actividade
  • Dotar a biblioteca de libros axeitados ó gosto dos usuarios
  • O noso centro está nunha zona rural na que non hai moitas librerías, e unha boa parte dos nosos alumnos non van nunca ou case nunca a mercarlibros, salvo os obrigatorios para as clases. Non teñen costume de ir  mirar, buscar, curiosear nunha librería e escoller libremente o que máis lles interesa. Así que este xa e de por si un obxectivo da actividade
  • Forzar ó alumnado a reflexionar sobre as razóns polas que lles atrae un libro, sobre si este pode ser interesante para os seus compañeiros, axeitado para unha biblioteca escolar…, Os alumnos terán que argumentar a súa selección ante os demais compañeiros.
  • Mellorar a formación do alumando como usuario, permitindo que participen no proceso que segue o libro dende a súa adquisición ata que o teñen á súa disposición nos andeis
  • Comprometer ó alumnado co coidado dos fondos da biblioteca.
  • Premiar a quen máis libros len e participan máis nas actividades da biblioteca: membros do club de lectura, equipo colaborador, etc

+ información no blogue da biblioteca:

17/12/14

Seica as mozas e os mozos non len... pois hai que animalos!!

Guía de lectura do IES  A Pontepedrinha (Santiago de Compostela) 
Van chegando aos poucos as guías de lectura que as bibliotecas escolares galegas recomendan aos integrantes das súas comunidades educativas para este período vacacional do Nadal 2014. Recollemos aquí unha presadiña de recomendacións elaboradas por bibliotecas de centros de ensino secundario. O preconcepto asentado nos medios de comunicación acríticos que falan continuamente de que "as mozas e os mozos non len"   perde pé cando se coñece de preto a realidade dos institutos de ensino secundario de Galicia onde as bibliotecas están activas e manteñen unha programación anual de calidade, na que destaca habitualmente a presenza de grupos de lectura de distintos niveis e intereses integrados no "clubs de lectura" do centro. Botar unha ollada a estas guías de lectura, a estas recomendacións, dá unha idea do que pasa nas bibliotecas dos centros a moitos niveis (coidado nas seleccións, dignidade dos materiais que se elaboran para poñer na man dos rapaces...), tamén no referente aos estímulos pola lectura en galego, esa asignatura pendente.

12/12/14

De lecturas e encontros con autores a través das TICs


As nenas e nenos do Club de lectura de 6º de primaria do CEIP de Leirado (Salvaterra de Miño) leron un libro de Ramón Caride e prepararon conxuntamente unha entrevista que remitiron ao autor por correo electrónico. Polo mesmo medio, o escritor respostou ás súas preguntas, e agora podemos ler todos o resultado no blogue da biblioteca

Hai mil fórumulas para conseguir vincular aos nenos e ás nenas á lectura. Os enfoques comunicativos na aprendizaxe das linguas e as tecnoloxías presentes nos centros (e a dispoñibilidade e xenerosidade da meirande parte dos autores e autoras), posibilitan actividades moi diversas... e velaquí un exemplo sinxelo pero de gran interese pedagóxico. 

3/12/14

Lecturas e recursos web sobre matemáticas

O lema Biblioteca escolar... matemático! está xerando moitas actividades nas bibliotecas escolares galegas e un importante número de excelentes recursos como esta Guía de suxestións de lecturas e recursos web para secundaria, realizada polo CPI de San Sadurniño (San Sadurniño, A Coruña). Unha excelente recompilación, coidada  na presentación e accesible na rede. Parabéns! 

1/12/14

Calendario do libro e da lectura 2015

http://rbgalicia.xunta.es/descargas/1417160145.jpg

A Secretaría Xeral de Cultura vén de facer público o Calendario do libro e da lectura para o ano 2015 que, entre outras novidades, recolle o tan reclamado  (e festexado nos centros escolares) 24 DE MARZO, Aniversario do nacemento de ROSALÍA DE CASTRO.

Ler ciencia en galego?

http://www.pinterest.com/bescolaresgal/ciencia-en-galego-nas-bibliotecas-libros-informati/
Hai suficientes libros de ciencia en galego, libros informativos de ciencia en galego, para poñer nas mans de nenas e nenos, de mozos e mozas???  Non resulta doado, pero case todo o que hai está aquí recollido, neste taboleiro de Pinterest creado pola Asesoría de bibliotecas escolares (Consellería de Educación- Xunta de Galicia) co gallo do Mes da Ciencia en Galego nas Bibliotecas - 2014. Tras cada un dos títulos reseñados hai unha referencia a outros títulos da colección, así como a editorial que os publica. 

Os centros educativos seguen a demandar da industria editorial  materiais en lingua galega para traballar en todas as áreas de coñecemento, para poder ofrecer unha colección equilibrada en contido, integradora, normalizada e que responda ás necesidades dos usuarios.

As mochilas viaxeiras no CEIP Isaac Peral

As mochilas viaxeiras son unha excelente fórmula para conseguir a implicación das familias na formación lectoras de nenas e nenos, pero precisan dedicación, tempo e recursos. O éxito depende, na meirande parte dos casos, dunha axeitada selección dos materiais que nelas se introducen. Non vale enviar ás familias calquera cousa. Cómpre elixir ben en función dos distintos niveis de lectura, dos distintos intereses que pode haber nun núcleo familiar. Nalgúns centros son os propios nenos os que, coa axuda do profesorado da biblioteca, elixe o tipo de materiais que máis lle pode interesar á súa familia. En calquera caso, canto máis personalizada estea a mochila maior vai ser a eficacia desta iniciativa. 

No CEIP Isaac Peral, de Ferrol, botan a andar as mochilas viaxeiras neste curso 2014/2015 e anúnciano a bombo e platillo no seu blog, con todo tipo de información.

25/11/14

Cine matemático

http://bibliofortexnvilas.blogspot.com.es/search/label/CINE%20E%20MATEM%C3%81TICAS
Desde o CPI Antonio Orza Couto, de Boqueixón chéganos esta selección de cine relacionado dalgunha forma con matemáticas, neste ano no que as bibliotecas enfocan parte da súa actividade a fomentar a lectura de textos matemáticos, a descubrir a matemática na vida cotiá.

Así mesmo, esta biblioteca propón á súa comunidade educativa un reto: 12 meses, 12 libros... relacionados coas matemáticas.

17/11/14

Lecturas terroríficas no CEIP Milladoiro (Malpica)



A biblioteca pode e debe aproveitar as oportunidades que se lle presentan para fomentar a lectura e a participación do alumnado en actividades coma esta, que tanto axudan ao desenvolvemento da expresión oral, por exemplo. O calendario anual hai que mantelo a raia para que non nos despiste dos obxectivos fundamentais na biblioteca escolar, pero presenta múltiples ocasións para traballar cuestións fundamentais: expresión oral, lectura, escritura, investigación...+ información no blogue de biblioteca do CEIP Milladoiro (Malpica) 

3/10/14

Referencias de Banda Deseñada desde Lalín

http://marelabe.blogspot.com.es/

Excelente páxina con referencias de Banda Deseñada, realizada desde a biblioteca "A Marela Tarabela" do IES Ramón María Aller Ulloa (Lalín, Pontevedra). Cada unha das referencias conta cunha ficha editorial e algunhas conteñen outras informacións. Pódense facer buscas por "etiqueta" e atopar títulos que son adaptacións de textos narrativos, aventuras, banda deseñada, banda deseñada galega, biografías, ciencia ficción, costumismo, crónica BD, denuncia e crítica, detectives, divulgación científica, economía, fantasía épica, filosofía, heroínas, histórica, humor, manga, etc. Unha ferramenta máis para adentrarse no mundo do cómic e a novela gráfica.

1/10/14

As bibliotecas anúncianse

 
Comezado o curso escolar, as bibliotecas dos centros teñen xa todo a punto para ofrecer os seus recursos e as súas múltiples oportunidades de achegarse á lectura e á información. Pero ademais de estar preparadas, teñen que chamar a atención das lectoras e dos lectores, facerse presente na vida do centro. 

Cómpre, así mesmo, comunicar ás familias que o centro conta cun instrumento esencial para contribuír á formación dos seus fillos e fillas como lectores críticos da información, como aprendices do mundo, como cidadáns que son. Así, estes pequenos vídeos que informan da existencia da biblioteca serven tamén para poñer en valor os recursos do centro e o tipo de ensino que o cadro de docentes está disposto a exercer. Nesta ocasión vemos o exemplo do CEIP Pepe de Xan Baña (Santa Comba, A Coruña), un pequeno centro rural que leva xa algúns anos traballando con metodoloxía de proxectos arredor dunha biblioteca escolar activa.

23/9/14

Convocatoria en apoio dos clubs de lectura para o curso 2014/2015

Desde o 15 de setembro de 2014 está aberto o prazo de presentación de solicitudes de asignacións específicas para o funcionamento de clubs de lectura nos centros de ensino público de Galicia, de titularidade da consellería de Cultura, Educación e Ordenación Universitaria, que matriculan alumnado de ensino secundario, bacharelato, formación profesional ou ensinanzas de réxime especial (escolas de idiomas, ensinanzas artísticas, conservatorios de música ou ensinanzas de persoas adultas). Cada centro debe presentar unha única solicitude aínda que o club de lectura integre a varios grupos de lectura, incluídos os grupos de lectura de adultos ou mixtos. O prazo remata o 10 de outubro. 
Esta iniciativa encádrase no programa Hora de ler para o fomento da lectura nos centros de ensino. 

7/7/14

Colaboro na biblioteca e o que máis me gusta é...


Xornada de convivencia do programa "Voluntarios de lectura-A" no CRD da Coruña (26-30 de maio de 2014) from Bibliotecas Escolares de Galicia on Vimeo.

Unha das experiencias más satisfactorias do pasado curso 2013/2014 foi o programa "Voluntariado de lectura-A" no que participaron 44 centros co alumnado de 3º Ciclo de Primaria.  A valoración das memorias de actividades presentadas puxo de manifesto o importante labor que estes nenos e nenas realizan nos seus centros, colaborando na xestión e dinamización da biblioteca escolar, pero tamén organizando actividades de lectura compartida, dentro e fóra do seu centro. Agora ben, un dos resultados máis interesantes do programa é comprobar que o alumnado que participa nestas actividades gana en autonomía, desenvolve habilidades de traballo colaborativo, mellora a súa competencia comunicativa, valora os bens comúns e o traballo en beneficio de outros, asume responsabilidades e, en definitiva, vai desenvolvendo competencias que lle han servir para a súa vida persoal, académica e social. 

Un dos momentos máis gratificantes da "xornada de convivencia" que viviron os rapaces dos centros gañadores no CRD da Coruña, entre o 26 e o 30 de maio, foi o martes á tarde, na presentación das súas actividades como voluntarios e voluntarias na biblioteca escolar. E ao final, pasaron polo "fotocol" para, xogando, amosar algunha das cousas que máis lles gusta facer como colaboradores da biblioteca. 

Os 48 rapaces asistentes, xunto cos seus profesores, a esta xornada de convivencia  procedían dos centros: 
  • CEIP José María Lage (Ortigueira, A Coruña)
  • CEIP de Covas (Viveiro, Lugo)
  • CEIP Filomena Dato (Barbadás, Ourense)
  • CEIP Manuel Sieiro (Crecente, Pontevedra) 
Durante a semana acudiron a obradoiros de diverso tipo (xogos cooperativos, lingua de signos, danzas do mundo, narración oral, lectura expresiva, cociña solidaria, xogos cantados, club de lectura) e asistiron aos locais da Cruz Vermella e  a biblioteca Ágora de A Coruña. todas as actividades estaban relacionadas co traballo colaborativo, o voluntariado de todo tipo e a lectura.

20/6/14

Sobre a lectura en tempo de vacacións

NESTA ENTRADA do blogue da biblioteca do IES Fernando Esquío (Neda, A Coruña), atopamos unha referencia a un artigo aparecido na revista Muy Interesante, sobre a importancia da lectura no verán para os nenos e nenas, que ben se pode empregar como argumento coas familias, para implicalos como mediadores e sensibilizalos sobre a importancia da lectura nesta etapa vacacional:
"Leer en verano es muy beneficioso, especialmente durante la infancia. Así lo ha demostrado Richard Allingont y sus colegas de la Universidad de Tennessee (EE UU), que aseguran que si dejamos de leer libros durante las vacaciones parte de las habilidades de lectura se pierden, lo que en los estudiantes supondría un retroceso de dos o tres meses en la capacidad lectora y el manejo del lenguaje. Por el contrario, los niños que leen pueden "ganar un mes de destreza en la lectura" cada verano. Esto supone que cada año se produce una diferencia entre ambos grupos de hasta tres o cuatro meses. Y, por lo tanto, que "cada dos o tres años que pasamos durante la infancia sin lecturas veraniegas implican perder al menos un año de aprendizaje", concluye Allington en la revista Reading Psychology

Por otro lado, un estudio similar realizado por expertos de la Universidad Johns Hopkins sugiere que los efectos acumulativos de no leer en la infancia se notan incluso durante la secundaria y en la universidad. Y que quienes leyeron de forma constante siendo niños están mejor preparados también cuando llega el momento de incorporarse al mundo laboral."

A biblioteca cerra por vacacións ??!!!

 
A biblioteca do IES Fontem Albei, de A Fonsagrada (Lugo), pecha por vacacións pero...  os seus libros non queren quedar encerrados todo o verán... Breve pero estupendo vídeo que nos chega desde este centro, onde xa levan algún tempo traballando pola alfabetización mediática do seu alumnado e que atopan na biblioteca un excelente tema para elaborar os seus guións audiovisuais.

11/6/14

Recomendacións de lectura desde Silleda

 
As nenas e os nenos de 4º de Primaria do CEIP de Bandeira (Silleda) recomendan lecturas para o verán. 

10/6/14

Hora de ler, un tempo para a lectura libre no horario lectivo

HORA DE LER on PhotoPeach  
Velaquí un exemplo de ambiente lector que se vive nunha boa parte de centros educativos galegos que puxeron a andar xa hai tempo a "hora de ler", un tempo para a lectura libre dentro do horario lectivo. HORA DE LER dá nome ao programa da administración pública galega para o fomento da lectura no contexto educativo, e foi este o termo que escolleron os centros para ese "tempo para a lectura" contemplado na normativa curricular desde 2007. Pero xa antes, concretamente a partir dos primeiros encontros do Plan de mellora de bibliotecas escolares en 2006, comezara a difundirse a iniciativa exitosa nun centro de A Coruña, o CEIP Emilia Pardo Bazán, que viña empregando a fórmula da "lectura silenciosa sostida", procedente das escolas anglosaxonas. A inclusión do tempo para a lectura en primaria (30'diarios) e a elaboración dos Proxectos lectores de centro axudou a espallar esta iniciativa, que hoxe se leva a cabo en practicamente todos os centros de primaria de Galicia e uns cincuenta institutos de ensino secundario. 

Desta forma, Galicia, leva xa tempo poñendo en práctica unha das recomendacións do Grupo de expertos de alto nivel sobre alfabetización que a Unión Europea deu a coñecer en 2012: "Reservar un tempo suficiente para a aprendizaxe da lectura a para as actividades de libre lectura, permitindo que os alumnos elixan os seus materiais de lectura e establezan o seu propio ritmo de lectura". 

As imaxes corresponden á "hora de ler" no CEIP de Leirado (Salvaterra de Miño)

19/5/14

As nais e os pais contan moito!


CONTANDO CONTOS by Slidely Slideshow

Contamos moito! foi o lema dunha das primeiras campañas do programa HORA DE LER, que aló polo ano 2007 achegou materiais para o profesorado e o alumnado de Educación Infantil a todos os centros educativos de Galicia. Que os pais e que as nais "conta moito" é algo fundamental á hora de enfrontar a formación dos lectores. Así o entenden os moitos centros que buscan a complicidade das familias á hora de organizar actividades arredor da narración, a lectura, os contos... Velaquí un fermoso exemplo desde o CEIP Santiago Apóstolo (Franza-Mugardos, A Coruña)

16/5/14

Lecturas ao patio!!

No CEIP Coirón-Dena  (Meaño, Pontevedra) comezaron este curso unha nova actividade de lectura compartida, que promete excelentes resultados: Lecturas ao patio! As nenas e nenos de 5º de Primaria van ler no recreo aos alumnos e alumnnas do 1º Ciclo. As imaxes da entrada no blogue da biblioteca que informa desta actividade, podemos apreciar a atención con que escoitan os destinatarios, o que supón xa en sí un gran valor para esta acción dos "voluntarios de lectura".

I Quedada Literaria en Vigo

Segundo nos informar desde o CEIP Frián-Teis (Vigo), algúns centros da comarca xuntáronse no Parque de Castrelos, de Vigo, na I Quedada Literaria: un encontro arredor da lingua, os libros e a lectura, nunha celebración previa do Día das Letras Galegas. 

Participaron, ademáis do Frián-Teis, o CEIP O Chouzo, o CEIP A Carrasqueira, o CEIP Ría de Vigo e o CEIP O Pombal, de Vigo: tamén o CEIP Santa Mariña, de Redondela. Asistiron alumnos e alumnas de dous centros de secundaria, o  IES do Castro (Vigo) e o IES Pino Manso, de O Porriño. A organización correu a cargo dun profesor do CIFP Manuel Antonio, integrante do equipo de biblioteca, e contaron coa participación do Servizo de Normalización Lingüística do Concello de Vigo. Parabéns!!!
Ver vídeo da TVG (minuto 11)

6/5/14

Libros á rúa!!

O IES Chamoso Lamas do Carballiño (Ourense) despregou os seus tenderetes na praza da vila para ofrecer lecturas aos veciños, nunha das súas moitas actividades arredor do Día do Libro. Podemos ver un resume de todas elas, e moitas máis imaxes, nesta entrada do seu blogue.
Para coñecer exemplos da diversidade de actividades que xeran as bibliotecas escolares galegas arredor desta data, entrar AQUÍ

30/4/14

Adictos e adictas á lectura na "Quinta dos libros"

 
A biblioteca "A Quinta dos libros", do CPI Manuel Suárez Marquier, de O Rosal, organizou unha actividade para celebrar o Día do Libro na que participaron alumnas e alumnos do Club de lectura do centro, e tamén persoas lectoras da comunidade escolar e do pobo, como unha libreira, unha enfermeira, unha limpadora do centro, o director da  Banda de Música e  Inspector de Educación da zona, entre outros. Velaquí as imaxes, algunha das voces e o bo ambiente lector que se vive no centro. Parabéns!!!

28/4/14

Hora de ler no CPI A Cañiza

Fala por sí só  este vídeo gravado coa colaboración do alumnado de 1º de ESO do CPI A Cañíza (A Cañiza, Pontevedra), co gallo do Día do Libro, e a modo de promoción da Hora de Ler que se leva a cabo no centro desde o curso 2010/2011,  con bos resultados, segundo afirman os responsables da biblioteca: 

"Dende o curso 2010-2011 e co obxectivo de crear ambientes lectores, empezamos con este tempo de vinte minutos diarios de lectura libre e silenciosa en horario lectivo.

Despois de tres anos, é unha actividade tan asumida e consolidada que xa nin nos cuestionamos, e que reporta uns beneficios incalculables na adquisición das competencias do noso alumnado."

+ apadriñamentos lectores para celebrar o Día do Libro


Apadrinhamentos Lectores from bemilladoiro on Vimeo.
A fórmula dos apadriñamentos lectores, das lecturas compartidas, segue a proporcionar imaxes fermosísimas para quen amamos a educación e a lectura. Pero aínda ha de profundizarse e ver a forma de sistematizar actividades como estas, que facilitan a adquisición de habilidades de lectura, pero tamén de escoita, e axudan a crear lazos afectivos entre o alumnado e os libros. 

As lecturas compartidas son acitividades para incorporar á vida cotía dos centros, e han de avaliarse sen medo porque provocan aprendizaxes, especialmente cando están coidadas polos mediadores en todos os seus detalles pedagóxicos, e cómpre que estas cuestións tamén se midan e se poñan en valor como "outras formas de aprender" máis aló dos libros de texto. 
No vídeo podemos ver ás nenas e nenos do CEIP Milladoiro, de Malpica, un dos centros que xa ten feito traballo neste sentido, por moito que o Día do Libro sexa unha ocasión tamén para as lecturas compartidas. 
Outros centros celebraron tamén o Día do Libro compartindo lecturas:
CEIP A Picota (Mazaricos, A Coruña)
- CEIP de Cervo (Cervo, Lugo) 
- CEIP Saco e Arce (Toén, Ourense)
- CEIP Vales Villamarín (Betanzos, A Coruña) 
- CEIP Plurilingüe Vista Alegre (Burela, Lugo) 

24/4/14

Día do Libro, libros e lecturas

Son moitas as actividades que organizaron as bibliotecas escolares para celebrar o Día do Libro neste curso 2014, e das que podemos ver algúns exemplos nesta ligazón, pero os apadriñamentos lectores seguen a sistematizarse como ferramenta para vincular afectivamente os nenos e as nenas á lectura. Os beneficios son tanto para os que len como para os que escoitan e as habilidades de lectura van mellorando en todas e cada unha das ocasións en que se reúnen para ler e escoitar. Nesta ocasión, desde a biblioteca do CEIP de CERVO (Cervo, Lugo), achégannos unhas imaxes que dan boa fe da oportunidade que supón para as nenas e os nenos este tipo de actividades de lectura compartida.

14/4/14

Día Mundial do Libro 2014

A Consellería de Cultura, Educación e Ordenación Universitaria publica un ano máis o marcapáxinas polo día Mundial do Libro, cun texto inédito, agasallo dun autor ou autora ás Bibliotecas Escolares de Galicia. Nesta ocasión, o texto é da autoría de Paco Martín, escritor galego que no 1984, hai agora trinta anos, recibira o premio Barco de Vapor (Edit. SM), polo seu libro As cousas de Ramón Lamote. Un "Ramón Lamote" que posteriormente fora galardoado co Premio Nacional de Literatura Infantil e Xuvenil (1986), entre outros recoñecementos, sendo o primeiro libro en galego que recebe esta distintción. 

O texto que Paco Martín adica ao libro neste ano 2014 é unha evocación das posibilidades que os libros ofrecen ás lectoras e aos lectores ávidos de coñecemento e imaxinación, con anceios de viaxe e aventura.

"A estribeira na que pousar o pé para cabalgar o airoso alazán de galope tendido cara ao horizonte promisorio"


7/4/14

O libro infantil na EEI Barrionovo


DIA DO LIBRO 14 from Aida DG on Vimeo.

O Día Internacional do Libro Infantil na Escola de Educación Infantil de Barrionovo (Arteixo, A Coruña), un espazo alegre para aprendizaxes gratas e duradeiras.A música é de Pablo Díaz

"Tui lee"

Xuntar máis dun milleiro de nenos e nenas de todas as idades e niveis de ensinanza non universitaria para participar nunha festa da lectura, é xa unha realidade nun concello galego. Velaquí o caso de Tui (Pontevedra), que baixo o lema TUI LEE, leva xa cinco anos aglutinando esforzos, imaxinación e vontades arredor dos libros e da lectura. 

As bibliotecas dos centros educativos de Tui, xunto coa Biblioteca Pública Municipal, organizaron unha vez máis o encontro de lectura TUI LEE, co gallo da celebración do Día Internacional do Libro Infantil,  desta vez no Claustro gótico da catedral de Tui onde os participantes, o seu profesorado e algúns avós, compartiron lecturas, recitais, música, danza e dramatización. No blogue da biblioteca do IES SAN PAIO, un dos organizadores, podemos ler unha pequena crónica deste día. 

Ademais da Biblioteca Pública Municipal, participaron alumnado dos seguintes centros: CEIP nº 1, CEIP Nº 2, CEIP Pazos, CEIP Randufe, CEIP Guillarei, CRA Mestra Clara Torres, CEIP Rebordáns,IES San Paio, IES Indalecio Pérez, Seminario de Tui e Colexio dos Maristas. 

2/4/14

2 de abril, un día con significado

O 2 de abril ten un significado moi marcado para os mediadores do libro e da lectura, ao conmemorarse o aniversario do nacemento de Hans Christian Andersen. O Día Internacional do Libro Infantil está xa moi presente nas programacións de bibliotecas e centros escolares. Pero é tamén o Día Mundial de Concienciación sobre o Autismo, recoñecido así pola Asemblea das Nacións Unidas en 2008. 

"O autismo é unha discapacidade permanente do desenvolvemento que se manifesta nos tres primeiros anos de idade. A taxa do autismo en todas as rexións do mundo é alta e ten un terrible impacto nos nenos, as súas familias, as comunidades e a sociedade", podemos ler na páxina web da ONU.

As bibliotecas escolares, atentas á realidade dos centros e das nenas e nenos que lles dan vida, van incorporando nas súas programacións algunhas actividades para dar resposta e cobertura en materia de lectura aos nenos e ás nenasque presentan esta discapacidade (tamén ás súas familias), poñendo así en práctica esa "atención á diversidade" tan difícil ás veces de concretar en feitos. Vemos algúns exemplos
  • Na biblioteca do IES Ribeira do Louro (O Porriño) están adquirindo materiais destinados ao alumnado con trastorno do espectro autista e ás súas familias. Velaquí unha guía dos materiais cos que conta a biblioteca, elaborada en colaboración cunha nai implicada: Pinterest sobre neurodiversidade (a imaxe desta entrada corresponde a este material)
  • A biblioteca do CEIP Frián-Teis (Vigo) propón unha serie de recursos para coñecer mellor este trastorno que presentan algúns alumnos e alumnas do centro. e que pode resultar útil a calquera docente. Así mesmo, esta entrada do seu blogue recolle exemplos de materiais que poden favorecer a lectura a este alumnado. 
  • No blogue da biblioteca do IES Pazo da Mercé (As Neves) lembran tamén esta data e achegan materiais relacionados cun caso concreto de autismo, "A canción de Manuel"

1/4/14

"Adiós rios, adiós fontes..." en lingua de signos

 
As bibliotecas escolares non deixan de sorprender... Velaquí unha actividade para o Día de Rosalía na biblioteca do CEIP de Santo Paio de Abaixo (Redondela, Pontevedra): un recitado colectivo do poema de Rosalía de Castro "Adiós ríos, adiós fontes" en lingua de signos. Parabéns ao profesorado que está detrás desta forma de "facer escola", que é unha forma clara de construír cidadanía.

21/3/14

Entregados os premios questasleyendo.org 2013 en Compostela


O pasado 19 de marzo, o auditorio da Biblioteca de Galicia acolleu o acto de entrega dos premios do concurso questasleyendo.org correspondente ao ano 2013 e a participantes do Estado Español. Este concurso é convocado pola OEI, a Organización de Estados Iberoamericanos para la Ciencia la Educación y  la Cultura e pretende crear unha rede de lectoras e lectores entre os mozos dos países iberoamericanos que puxeron en marcha blogs persoais relacionados cos libros e a lectura. 

A organización escolleu Galicia para a entrega de premios polo alto número de participantes desta comunidade, e porque tanto o blogue gañador como catro dos dez blogues finalistas son de mozos e mozas galegos. Tamén acudiron ao acto as cinco autoras do blogue finalista "Sueños de papel en una ciudad de tinta", que xunto coa súa profesora fixeron a viaxe desde Madrid ata Compostela, coa ilusión que describen nesta entrada do blogue.

Presidiron o acto Fabiola Sotelo, en representación da OEI, María Jesús Gil, da fundación SM (patrocinadora do concurso) e o Director Xeral de Centros e Recursos Humanos, José Manuel Pinal, responsable das políticas de bibliotecas escolares e fomento da lectura en contexto educativo, da Consellería de Cultura, Educación e Ordenación Universitaria. 

Inés Miret, responsable de ¿Qué estás leyendo? moderou unha mesa redonda coa participación dos dous irmáns autores do blogue finalista, Libros Lectureka!,  e un representante de cada un dos blogues finalistas presentes no acto, e na que compartiron experiencias, opinións e sentimentos sobre os libros e a lectura.

Xa está aberto o prazo do concurso ¿Qué estás leyendo? correspondente a 2014, desta vez destinado a lectores entre 15 e 17 anos, e que ten como premio unha viaxe a Bos Aires, para un encontro entre os gañadores dos diversos países iberoamericanos. O prazo de inscrición dos blogues remata o 30 de xullo.

11/3/14

A coller a cámara xa!!!

A lectura como obxecto de estudo, de expresión, de creatividade... Son varias as bibliotecas que convocan entre o seu alumnado concursos de fotografía coa lectura como tema. Nesta ocasión, o IES Pedra da Aguia (Camariñas, A Coruña), amplía a súa convocatoria a todos os centros de primaria e sencundaria de Galicia. Así podemos velo nas bases desde II Certame fotográfico "Ollando lecturas" que toma como tema "a lectura na vida cotiá". O prazo de presentación de roxianis remata o 6 de abril de 2014.

Un último acerto desta convocatoria é que os premios son vales de distintas contías para canxear en librerías seleccionadas polo autor ou autora premiado, cun apartado especial para alumnado do propio IES Pedra da Aguia, a desembolsar nunha librería do concello de Camariñas.

10/3/14

O 2 de abril chega en nada

Coma en anos anteriores as diferentes seccións da IBBY difunden a imaxe e o texto conmemorativos do Día Internacional do Libro Infantil, a celebrar o vindeiro 2 de abril, en memoria de Hans Christian Andersen. 

Nesta ocasión, é Irlanda o país encargado de poñerlle palabra e imaxe a este cartel que percorre o mundo enteiro lembrando a necesidade de manter viva unha literatura de calidade destinada a nenos e mozos. O texto "Carta aos nenos do mundo" é da escritora e editora irlandesa Siobhán Parkinson, que recibiu entre outros premios o Premio Laureante na nög, o Premio de Literatura Infantil de Irlanda. Pola súa parte, a imaxe do cartel é de Niamh Sharkey, unha ilustradora irlandesa así mesmo merecedora do Premio de Literatura Infantil de Irlanda, entre outros galardóns.

GALIX, a Asociación Galega do Libro Infantil e Xuvenil, difunde este material e tamén un concurso de expresión creativa que convoca a OEPLI (Organización española para el libro infantil y juvenil),  no que poden participar as nenas e nenos dos centros de ensinanza primaria e dos dous primeiros cursos de ESO. Este concurso "INVITA A HANS CRHISTIAN ANDERSEN..." proponlle ás nenas e aos nenos que deseñen unha postal para invitar a Anderssen a visitar e coñecer o sitio no que viven, neste caso, Galicia. Pódense consultar as bases AQUÍ. O prazo para a entrega de orixinais remata o 2 de abril e deben enviarse ao domicilio de GALIX (ver nas bases).

Versos de mulleres que falan de mulleres

Selección poética desde a biblioteca do IES de Poio (Poio, Pnotevedra), co gallo da conmemoriación do Día Internacional da Muller, o pasado 8 de marzo.

5/3/14

Os países que máis len

Interesante mapa da lectura no mundo... aínda que non hai datos de todos os países... pode servir para coller perspectiva. Vía Microsiervos

14/2/14

Unha data tamén axeitada para reforzar a lingua




Cando unha biblioteca está atenta a TODAS aquelas competencias básicas do alumnado que pode e debe reforzar, aproveita canta oportunidade dá a actualidade para ofrecer propostas que faciliten a mellora dalgún aspecto curricular. Velaquí temos un excelente exemplo, desde o CEIP Milladoiro, de Malpica: atent@s como están á mellora da competencia lingüística do seu alumnado, aproveitan o 14 de febreiro para mobilizalos arredor dunha canción en lingua galega: "Quérote máis",  do grupo Sonoro Maxín, con concurso de literatura creativa incluído. Podemos ver máis no seu bloguePoñer atención aos aspectos afectivos, lembremos, ten unha potencialidade educadora moi significativa e víncúlanos fortemente ás aprendizaxes realizadas.

12/2/14

Amor ás palabras, palabras de amor


O mes de febreiro trae unha data motivadora para traballar a poesía e as bibliotecas escolares aprovéitana ben. Velaquí algúns exemplos: 

11/2/14

Crocodilo namorado cobra vida na voz dos lectores

 
Os contos cobran vida nas voces dos pequenos lectores. Velaquí oa versión do conto Crocodilo namorado, de Daniela Kulot, da editorial Kalandraka, nas voces das nenas e nenos de Infantil-3 anos do CPI de Mondariz (Mondariz, Pontevedra).

4/2/14

O "libro de visitas" da biblioteca do CEIP Condesa de Fenosa

 
Moitas bibliotecas escolares foron incorporando un "libro de visitas" para recoller as sinaturas de autores e outros visitantes "ilustres" á biblioteca. Aos poucos, estes libros de visitas van construíndo unha parte da memoria da biblioteca e son, tamén, documentos de valor bibliográfico que enriquecen a súa colección. 

No CEIP Condesa de Fenosa (O Barco) decidiron dixitalizar estes "agasallos" dos autores que visitaron a súa biblioteca e veñen de poñelos a disposición de todos os lectores a través do seu blogue.

30/1/14

Paz e poesía...

Paz, poesía e moita creatividade no IES de Poio (Poio, Pontevedra). Velaquí os traballos do alumnado de 4º da ESO para o Día da Paz e a Non Violencia:

 

Encontros de BD na Mariña

Xa van polos VI Encontros de Banda Deseñada ña Mariña, organizados polo IES O Perdouro de Burela. Case un clásico, porque se o importante é poñer en marcha inicitivas... o imprescindible é mantelas, facer que duren, que se convertan en rutina, de maneira que se aproveite a dinámica creada. Niso están!
Forma parte das Xornadas a convocatoria do Concurso de banda deseñada con dúas modalidades (unha dirixida a rapaces e rapazas ata 14 anos e outra na que se recollen os traballos elaborados polos xoves de 15 a 18 anos).A convocatoria acaba de facerse pública.
Obradoiros, exposicións, proxección de curtas, encontros con autores de cómic,... son algunha das actividades ás que se pode asistir, como pode observarse no blogue dos Encontros.

29/1/14

A biblioteca busca lectores con PAZ-CIENCIA

Unha vez máis a Escola de Educación Infantil Barrionovo (Arteixo, A Coruña), sorprende cun xogo de palabras espléndido e acertado. A biblioteca integra as actividades relacionadas co Día Escolar da Paz e a Non Violencia nunha campaña iniciada a comezos do curso, aproveitando o cartel e o lema das bibliotecas escolares deste curso 2013/2014: Ler ciencia na biblioteca escolar. Parabéns!!

Día da Ilustración en Galicia 2014, da man de Miguelanxo Prado

A Consellería de Cultura, Educación e Ordenación Universitaria incluíu por primeira vez, no calendario da lectura de 2014, a celebración do Día da Ilustración en Galicia, coincidindo coa data de nacemento de Castelao, e celebrando así unha das facetas desta importante figura da historia e da cultura galega. E a estrea é de luxo pois vén acompañada dun cartel deseñado por Miguelanxo Prado, un dos máximos representantes do mundo da ilustración galega. Este cartel serve para publicitar unha programación específica sobre o mundo da ilustración nas bibliotecas nodais de Galicia (A Coruña, Lugo, Ourense, Pontevedra, Santiago de Compostela, Vigo) así como a Biblioteca de Galicia, na Cidade da Cultura de Compostela.

27/1/14

Lectura crítica e competencias mediáticas

 
Excelente mesa en relación coa lectura crítica e as competencias mediáticas ou de uso e produción de información nos medios de comunicación (un dos obxectivos da ALFIN, ou da máis completa Alfabetización mediática e informacional). Estas intervencións teñen lugar no I Congreso Comunicación e Educación, organizado pola Universidad Autónoma de Barcelona en maio de 2011. Interveñen varios conocidos das bibliotecas escolares galegas: Pilar Pérez Esteve, Fabio Tropea e Josep Manuel Pérez Tornero, entre outros. Recomendamos vivamente as intervencións de Pilar e de Pérez Tornero, directamente relacionadas coa lectura que precisamos ensinar ao noso alumnado nestes momentos.

24/1/14

ANIMACIÓNS DE LIBRO

Se eu fose un libro...
Baixo este comezo de texto hai un mundo de posibilidades. Xogar con e,l para que cadaquén vaia dando unha resposta, non sería mala cousa, pero alguén o fixo por nós e cunha calidade digna de difusión.
A animación de Very2much seguindo un texto orixinal de José Jorge Letria e ilustracións de André Letría.
Vexámolo!

8/1/14

Sobre libros e lectura en 2014. Os expertos opinan...

A páxina Lectura Lab, da Fundación Germán Sánchez Ruipérez, publica unha entrada en relación coas predicións que algúns expertos do mundo do libro, a edición, a librería, a lectura... realizan para este ano 2014. Interésanos especialmente o comentario de Gabriela Adamo, Directora da Feira do Libro de Bos Aires, quen asegura: 

"Lo más difícil de prever –en su opinión– es cuáles serán los cambios que las nuevas modalidades de lectura (en línea, salteadas, en paralelo con varios otros textos y actividades, sin el contexto “contenedor” del libro a la vieja usanza) generarán en el cerebro humano, algo que las neurociencias recién están comenzando a investigar".
Adamo también cree que en ese aspecto "está el mayor desafío de todos los que trabajamos en torno a la promoción de la lectura: más allá de los cambios en la industria y en el negocio, lo más importante es que sigamos cuidando, estimulando y transmitiendo el valor de la lectura como la gran puerta de acceso a un mundo con más sabiduría, imaginación, tolerancia y riqueza para todos".