Punto de lectura para nais e pais

Procurar a complicidade das familias e a súa colaboración na formación dos lectores pódese facer de moitas maneiras. As bibliotecas escolares galegas van incorporando espazos específicos para pais e nais, ben no interior da biblioteca ou ben nalgún outro espazo próximo, gañando así para a lectura eses recunchos ás veces esquecidos.

No CPI de Panxón (Nigrán, Pontevedra) veñen de inaugurar este Punto de lectura para as familias, un espazo creado con moito gusto, con respecto e dignidade. A invitación non pode ser máis clara: "se ti les, eles len". Ademais, a información chega a todas as casas a través da Guía de lecturas Nadal 2011

Unha oportunidade para a formación dos lectores e das lectoras

A presenza dunha feira do libro no entorno próximo ao centro educativo pode facilitar actividades de gran interese na mediación cos novos lectores .

Nos primeiros días de decembro, a cidade de Pontevedra acolleu a Feira das Industrias Culturais de Galicia, CULTURGAL, e o profesorado responsable da biblioteca do IES Sánchez Cantón, desta cidade, aproveitou para realizar unha experiencia de formación de lectores visitando a feira e participando en varias actividades, ao tempo que se entrevistaban con libreiros alí presentes. O alumnado participante foron os membros do club de lectura TINTA VIVA, que levaban un tempo preparando esta iniciativa.

No seu blogue podemos coñecer a experiencia de forma máis detallada.

10 decembro: Día dos Dereitos Humanos

63 anos despois da súa proclamación, segue sendo necesario lembrar esta data, 10 de decembro, na que a Asamblea Xeral das Nacións Unidas aprobou a Declaración dos Dereitos Humanos.

Necesario porque nin tan sequera nos países que asinaron esta declaración están garantidos estes dereitos en igualdade de condicións para toda a poboación. Non hai máis que botar unha ollada ao noso arredor, asomarse ás noticias.

Mais aínda así cabe pensar que un outro mundo é posible, que hai arrecendos espallados no ar que nos permiten prender unha candea pola esperanza, por estas xeracións, hoxe nen@s, adolescentes, que medran nas nosas aulas, ao abeiro das nosas Bibliotecas -das súas lecturas, da súa información, da súa formación- nen@s e adolescentes que se implican ilusionad@s e con empeño en proxectos coma "Coñecernos para querernos", nun intercambio persoal e de coñecementos con nen@s dos campamentos saharahuis, para quenes a apertura dunha biblioteca con (o Bubisher) ou sen (O Niño do Bubi) rodas, supón moito máis que un mundo de oportunidades. Para acceder á ilusión, aos soños, á formación, ao coñecemento doutras culturas, doutro idioma.

E con esa candea acesa, brincan faíscas que prenden en case un cento de Bibliotecas Escolares Galegas, que por todo o país escollen cada unha un fermoso álbum ilustrado para agasallar a ese recén estreado Niño do Bubi, porque, coma nas nosas propias Bibliotecas, toda inauguración é unha festa. A esa festa que é a lectura, nesas bibliotecas acubilladas na area, queremos enviar estes álbumes como aves portadoras de boa sorte, como bubishers* cheos de cor, imaxes, historias. Porque as nosas bibliotecas, @s nos@s lectores e lectoras, compartimos co Bubisher, cos lectores e lectoras das súas bibliotecas a crenza firme nos Dereitos Humanos, dende o seu 1º artigo: "Tod@s nascemos libres e iguais en dignidade e dereitos"

* O bubisher (Oenanthe leucopyga e Oenanthe leucura) é un paxariño tímido que vive na Península e tamén en África, aquí chamámoslle collalba negra e no Sáhara o seu nome significa paxaro da boa sorte, no dialecto hassaní é Bubchir بوبشير (o da boa nova) porque adoita aniñar e criar despois das choivas, o que quer dicer que medrará a herba, algo moi importante para quen ten gando.

Bubisher é tamén o nome dun autobús-biblioteca que circula entre os campamentos do Sáhara para levar lectura e información. Ou sexa, unha biblio... pero con rodas!!!

Se queredes unirvos á iniciativa de Álbumes para o Bubisher, só tedes que poñer os vosos datos xunto ao resto das Bibes Galegas.

Música e DDHH

Texto de Maribel Serantes (CEIP Os Casais)

Imaxe atopada aquí

Lecturas compatidas no CEIP de Andrade

No blog RAIOTECA, da biblioteca do CEIP de Andrade (Pontedeume, A Coruña), podemos coñecer unha experiencia de participación das familias en actividades de fomento da lectura e de formación dos novos lectores. "Lecturas compartidas" é unha fórmula moi probada xa en moitos centros escolares, e tal como nola contan aquí, pode ser vir para seguir animando a outros centros a poñela en práctica.

A implicación das familias é imprescindible, pero tamén hai que facilitala, vehiculizala, favorecela... creando espazos e tempos que a fagan posible.

Bibliotecas Escolares en Tránsito. Congreso en Compostela

Congreso Bibliotecas Escolares en Tránsito. Santiago de Compostela 10, 11 e 12 de noviembre.

Organizan: Ministerio de Educación e Consellería de Educación da Xunta de Galicia. Nunha actividade asociada ao congreso, os Encontros Biblitoecas Escolares en Tránsito, para posibilitar a participación de profesorado galego da Rede de Bibliotecas Escolares de Galicia. En total, 500 asistentes que poñerán en común inquedanzas e reflexións en relación coa biblioteca escolar que está a definir as súas funcións e o papel que ten que xogar na escola do Século XXI.
Programa

Boa campaña publicitaria a favor da lectura

Atopado en Biblioaponte, blogue da biblioteca escolar do IES de Ponteceso, e procedente de Litteratum.com

Cartaz de Bibliotecas Escolares de Galicia 2011-2012

Emma Ríos, ilustradora galega do mundo da banda deseñada, interpreta o lema escollido para este curso 2011/2012: Biblioteca escolar, última xeración.
Este cartaz chegará aos centros nos primeiros días de outubro, co fin de difundir a biblioteca escolar entre os distintos sectores da comunidade educativa.
+ información sobre Emma Ríos en Banda Deseñada, o portal do Consello da Cultura Galega dedicado ao cómic galego e aos seus autores.

Vídeo resume da IV Xornada dos Clubs de Lectura

IV Xornada dos Clubs de lectura. Xuño 2011 from Bibliotecas Escolares de Galicia on Vimeo.

"Ler e escoitar", visto desde un centro.

Durante o primerio trimestre do curso 2010/2011 desenvolvéronse as distintas fases dun concurso de lectura en voz alta, Ler e escoitar, convocado pola Consellería de Educación e O.U., cunha participación máis que aceptable de centros educativos de todo o país (123), especialmente das poboacións máis pequenas. O acto final, no que se premiaron as lectoras e os lectores por cada modalidade e categoría, foi unha festa da lectura. No momento de avaliar o traballo do curso, unha biblioteca escolar, a do CEIP Xosé Mª Brea Segade, de Taragoña-Rianxo, realiza unha reflexión ben interesante. Desde a Asesoría de bibliotecas escolares, valórase moi positivamente que os centros adapten esta iniciativa ao seu contexto e aos seus intereses, pois era un dos obxectivos do concurso. Só un enfoque non competitivo e solidario dos mediadores permitirá que se entenda este tipo de certames coma unha oportunidade, e non coma unha mera competición onde un pon o cóbado para que o outro non chegue. Reproducimos esta valoración polo seu interese:

"Na fase que se realizou no centro participaron dezaseis alumnos e alumnas na modalidade individual e doce na modalidade de grupo. Todos eles foron gravados en vídeo, para o que contamos coa colaboración do equipos das TICs, e un xurado (formado polo director, a responsable de biblioteca e a especialista en Educación Física), que escolleu os nosos representantes para a fase autonómica. A implicación do alumnado participante foi total, viñeron á biblioteca nos recreos a escoller os seus textos libres e a ensaiar, e practicaron nas casas e nas aulas cos seus titores/as. Durante a semana das gravacións respirábase a emoción e os nervios nas clases de 5º e 6º, por iso foi tan difícil para o xurado tomar unha decisión. Valoramos aos que fixeron as mellores lecturas en voz alta pero era imposible non valorar tamén a aqueles que fixeron un esforzo enorme, se prepararon a conciencia e leron moi ben ou a aqueles que sendo moi bos lectores decidiron participar na modalidade na modalidade grupal para ler con amigos ou amigas que tiñan máis dificultades ou que non se atrevían a facelo sos. Todos recibiron un agasallo pola súa participación, pero o momento de dar o veredito do xurado foi para nós e para moitos un momento triste.

O equipo de biblioteca tivo dúbidas antes de participar sobre se o concursos era unha boa estratexia para motivar a lectura en voz alta; cremos que si; o noso alumnado demostróunolo, pero preferimos para o noos centro a realización de actividades non competitivas onde o importante sexa superarse a un/unha mesmo/a pero sen comaprarse cos demais e onde os mellores resultados sexan froito da cooperación entre todos e todas.”

Premio Sunshine Award 2011

Este espazo web recibiu con satisfacción, hai uns días, a sorpresa de ser agasallado con este luminoso recoñecemento, por parte do blog Caderno da crítica, a quen llo agradecemos. Cumprindo co ritual deste tipo de "premios", propoñemos outros 12 blogs que, coma este, serven para difundir o libro e a lectura, desde a óptica da escola. Blogs que mantén un profesorado comprometido coa educación dos máis novos, e coa sociedade, con profesionalidade e moito tempo persoal dedicado á formación de persoas lectoras. Entre a marea de espazos web das bibliotecas escolares galegas, velaquí unha ducia de soños e de pequenas utopías:

Biblioteca. Milladoiro. Malpica. CEIP Milladoiro (Malpica, A Coruña)

Pasapáxina. CEIP José Cornide Saavedra (A Coruña)

O lar de frianciño. CEIP Frián-Teis (Vigo, Pontevedra)

Raioteca. CEIP de Andrade (Pontedeume, A Coruña)

O Recanto de Leo. CEIP A Lama (A Lama, Pontevedra)

Bibliomanía. IES de Sanxenxo (Sanxenxo, Pontevedra)

O Segrel do Penedo. IES de Fene (Fene, A Coruña)

Biblioiris. IES Luís Seoane (Pontevedra)

Biblioteca do CMUS de Lugo (Lugo)

Club de lectura O Balbordo (IES Río Cabe, Monforte, Lugo)

Nós tamén navegar. Club de lectura (IES Lagoa de Antela, Xinzo de Limia, Ourense)

Biblos Vivos. Club de Lectura (IES Pedras Rubias. Salceda de Caselas, Pontevedra)

Competencia lingüística e número de libros na casa

Unha vez máis confírmase a relación entre o número de libros existentes no domicilio familiar e os resultados nas probas de comunicación lingüística. Desta vez, o gráfico corresponde ao estudo da "Evaluación General de Diagnóstico 2010, Educación Secundaria Obligatoria, 2º curso). Ver o informe completo: INFORME EGD 2010-ESO

Un verán de libros... e de música, e de cine...

As bibliotecas escolares galegas están a piques de botar o peche por este curso (aínda quedan labores que facer... ) pero antes, continuando coa súa función de orientación e formación da competencia lectora, tiveron tempo para seleccionar lecturas para o verán: lecturas para as lectoras e os lectores de todas as idades, combinando o novo co clásico, recuperando textos imprescindibles, avanzando novidades que prometen... velaquí as recomendacións de libros, películas, discos e actividades que nos propoñen: UN VERÁN DE LIBROS

IV Xornada dos Clubs de lectura. Materiais

O venres 10 de xuño celebrouse en Santiago de Compostela a IV Xornada dos Clubs de Lectura, coa asistencia de 205 profesoras e profesores que coordinaron durante o presente curso os clubs de lectura en centros de ensino secundario de toda Galicia. O 54% dos centros públicos que matriculan alumnado de ESO, bacharelato, formación profesional, idiomas ou ensinanzas artísticas, contan cun club de lectura, que pode albergar un ou varios grupos de lectura. Unha realidade que non se pode obviar cando se observa o fenómeno da lectura en Galicia.
Neste enlace pode accederse aos materiais e, nos vindeiros días, aos vídeos das diversas sesións.
+ información no blogue LER EN MANCOMÚN

Hora de ler.... e de escribir.

No IES Vilalonga (Sanxenxo, Pontevedra), froito da colaboración entre a Biblioteca Escolar e mais o ENDL, realizouse un ano máis o certame literario, nesta ocasión baixo o lema ABRIL DOS LIBROS E MAIO DAS LETRAS, unha convocatoria que inclúe a creación literaria pero tamén os traballos de investigación. Aumenta paulatinamente o número de alumnas e alumnos participantes, chegando este ano aos 280. + información no blogue: A beira das palabras

IV Xornada dos Clubs de Lectura dos centros de ensino secundario de Galicia

Un ano máis, reunirase en Santiago de Compostela o profesorado que coordina os clubs de lectura en centros de ensino secundario de Galicia, no que será a IV Xornada dos Clubs de Lectura, e no que participarán desta vez, 200 profesores e profesoras de toda Galicia. Esta xornada servirá para mellorar a formación e intercambiar experiencias, propostas e iniciativas de colaboración dun profesorado comprometido coa educación e coa formación do seu alumnado como lectores e como cidadáns.
Artigo relacionado.

Unha fórmula flexible para facer lectoras e lectores

A idea de propiciar as lecturas compartidas pode adpatarse a múltiples contextos e a todo tipo de alumnado, e pode tamén responder a distintos obxectivos, aínda que sempre a finalidade última será que a experiencia lectora resulte tan grata que favoreza o vínculo entre o lector e a lectura.... Chéganos a crónica da experiencia levada a cabo no CEIP de Louro (Muros, A Coruña), que reproducimos en palabras da profesora responsable da biblioteca:

"Fixemos dous grupos: Infantil e 1º ciclo (aínda que algúns de 2º estaban no outro grupo); 2º e 3º ciclos (cos "engadidos" de 2º). Mediante sorteo fixemos parellas formadas por unha persoa de cada un dos grupos (a excepción de infantil de 3 e 4 anos, que ína dous ou tres xuntos co rapaz ou rapaza que lle tocara do outro grupo).

As lecturas preparáronnas previamente e, a diferencia doutros centros, polo que vin, é que os dous membros da parella lína o conto (non só os maiores aos pequenos). Calculamos un promedio de 10 minutos para cada lectura. Cando un dos compoñentes da parella terminadaba, tocáballe o truno ao outro.

A verdade é que era unha imaxe impresionante. A todo o profesorado lle encantou e tamén aos nenos e nenas. Impactounes o respecto que demostraba cara ao "padriño" ou "madriña" de turno, tanto se fora dos maiores como dos pequenos".

Compartir lecturas cos pequenos ten "miolo"

As mozas e mozos do IES Poeta Díaz Castro (Guitiriz, Lugo) sumáronse este ano á pequena marea de lectores que andan a compartir historias e poesías cos máis pequenos. No seu blogue podemos acceder á crónica desta experiencia que, semella, resultou grata para todas e todos... a lectura de contos nos colexios de Guitiriz, Parga e A Castellana.
Compartindo Libros (I, II e III)

Nós queremos salientar un anaco da propia valoración que fan desde a biblioteca escolar, porque nos parece moi esclarecedora: a participación neste tipo de actividades, aínda que son gratas, non son un xogo, e conteñen unha grande potencialidade de aprendizaxe de todo tipo de competencias (lingüísticas, e outras):

"Cremos que o resultado da experiencia foi moi positivo para todos. Cada grupo tivo primeiro que organizarse, repartirse os textos, papeis, acordar momentos para ensaiar, realizar unha lectura en alto en grupo intentando transmitir a emoción ou chiste ou pena, do conto, vencer a vergoña e se enfrontar á unha lectura cun público esixente … volver ós colexios onde estudaron a primaria e ler moitas veces diante dos seu antigos mestres, dos seus veciños, etc. En fin quedamos bastante satisfeitos da experiencia e dispostos a repetir."

Libros con ciencia

Unha proposta da biblioteca escolar do CEIP Graxal (Cambre, A Coruña): actividade voluntaria, no recreo, arredor de "libros con ciencia"... porque ler hoxe é ler todo tipo de textos en todo tipo de soportes con todo tipo de finalidades... e as bibliotecas escolares o están facendo posible.

Ver toda a información no blogue da biblioteca: Librolandia.be

Unha marea que se estende... + madriñas e padriños lectores

Seguen chegando noticia de bibliotecas escolares galegas que botan a andar (ou repiten) esta iniciativa, e que aseguran resultados excelentes. Velaquí máis exemplos:

• CEIP de Cervo (Cervo, Lugo). Día do Libro: madriñas e padriños.
• CEP Xosé Mª Brea Segade (Taragoña-Rianxo, A Coruña). Celebración do Día do Libro Infantil (Interesantes os comentarios das nenas e dos nenos)
• CEIP de Leirado (Salvaterra do Miño, Pontevedra): Lectura compartida
• IES de Sanxenxo (Sanxenxo, Pontevedra): Apadriña a un lect@r (Neste caso as mozas e mozos do IES foronlle ler ás nenas e nenos dos colexios de Portonovo, A Florida e Magaláns)
  

+ lecturas compartidas....

Que ben se le na herba!!! Velaquí outro exemplo de apadriñamento lector/amadriñamento lector, desta vez no CEIP Frián-Teis (Vigo, Pontevedra), tamén co gallo do Día do Libro.
+ información no blogue da biblioteca do centro: O lar de Frianciño.

Tamén nos chega noticia do CEIP O Ramo (Fene, A Coruña), do ben que o pasaron as nenas e os nenos do colexio, nunha actividade máis de amadriñamento/apadriñamento lector.

E como non hai dous sen tres, velaquí as fermosas imaxes da actividade Eu leo para ti, celebrada no CEIP Milladoiro (Malpica, A Coruña).

Outra forma de celebrar o Día do Libro

No CEIP Eduardo Pondal (Vigo, Pontevedra) celebraron o Día do Libro cunha práctica de lectura xa bastante estendida nas bibliotecas escolares galegas: a lectura de contos por parte do alumnado maior aos máis pequenos do cole. Un exemplo de convivencia coa lectura como mediadora... un exemplo de fomento da lectura, como práctica socializadora. Parabéns a toda a comunidade educativa que fai esto posible!

Lecturas en abril en centros de ensino galegos.

Lectura continuada de poesía, para facer vivir a Palabra, un 14 de abril, no IES Ribeira do Louro (O Porriño, Pontevedra).

Pola súa parte, os nenos e nenas do CPI Manuel Suárez Marquier (O Rosal, Pontevedra) marcharon con Ulises rumbo a Ítaca, nunha lectura continuada da Odisea para celebrar o Día do Libro. Velaquí a súa crónica desta viaxe: "Chegamos a Ítaca"

O lugar da lectura: Día Mundial do Libro

Achégase paseniño o 23 de abril, Día Mundial do Libro e dos dereitos de Autor, en declaración da UNESCO. As bibliotecas escolares galegas celébrano reivindicando os espazos para a lectura, condición imprescindible para facilitar esta actividade, que precisa sosego, tempo, calma, libros e lectores activos.

"O lugar da lectura" é tamén un fermoso texto que o poeta Carlos Negro escribiu para as Bibliotecas Escolares de Galicia. Con este texto, e imaxes da Asesoría de Bibliotecas, vén de editarse un marcapáxinas especial co fin de celebrar este Día Mundial do Libro.

MARCAPÁXINAS

Memoria dun neno labrego

Co gallo da celebración dos 50 anos da publicación de Memorias dun neno labrego, de Xosé Neira Vilas, son moitos os centros que están a programar actividades e facendo revivir a Balbino, o protagonista, coma neste caso, na voz dos propios lectores de hoxe. Alumnado e profesorado do IES Pino Manso (O Porriño, Pontevedra) está realizando lecturas deste texto, que gravan en vídeo nun proxecto de gran interese, poñéndolle voz e cara a un libro fundamental na historia e no presente da literatura infantil e xuvenil galega, na literatura galega sen cualificativos. No blog da biblioteca podemos acceder aos distintos capítulos. Pola súa parte, no CEIP Frian-Teis (Vigo, Pontevedra) aproveitaron o Día Internacional do Libro Infantil para dedicar a súa actividade a Memorias dun neno labrego e ao seu autor.

Abril, mes dos libros

O mes de abril é un fervedoiro de actividade nas bibliotecas escolares galegas. A modo de exemplo, esta PROGRAMACIÓN PARA O MES DE ABRIL, do CEIP Quintela (Moaña, Pontevedra), onde o libro e a lectura son os auténticos protagonistas...

2 de abril, Día do Libro Infantil e Xuvenil

Velaí chega abril, chamando á porta cos seus petos cargados de libros... moi moderno el, trae tamén libros electrónicos, non o vaian tachar de antigo... libros en fin, para nen@s e moz@s, pero de calidade... é iso o que lle pedimos a Abril sempre.... + información aquí

Lipdub sobre a biblioteca escolar e a CDU no IES Fontem Albei

O Equipo de Biblioteca do IES Fontem Albei (A Fonsagrada, Lugo) vén de subir á Rede este magnífico lipdub no que participa toda a comunidade educativa, e que xorde como iniciativa gozosa de formación de usuarios da biblioteca. Como din os seus responsables, nada está posto ao azar.

"Dende o Equipo de Dinamización da Biblioteca Escolar non queríamos facer un lipdub por facer senón contar unha historia (aproveitando as novas tecnoloxías), a historia dun libro esquecido que tras percorrer boa parte do centro retorna ao seu lugar natural: a biblioteca. Aproveitamos a historia para, ademais de dar a coñecer o centro e potenciar a biblioteca,recordar a CDU mediante a asociación de de imaxes, números e cores, en definitiva, facer formación de usuarios. Nada do que aparece no vídeo está posto ao azar. Dende o título do mesmo "O final da conta atras" referíndonos ao tempo que lle resta ao libro ata chegar á Biblioteca como as distintas esceas. "

Parabéns mil a toda a comunidade educativa!!!

Profesorado e lectura

Desde o curso 2009/2010 están a circular polos centros galegos unhas maletas viaxeiras que a Asesoría de Bibliotecas Escolares (Consellería de Educación) facilita en préstamo temporal, en colaboración cos Centros de Formación e Recursos. Unha destas maletas está dedicada á lectura. Contén publicacións de referencia no ámbito do fomento da lectura e da aprendizaxe de competencias avanzadas de lectura.
No blogue da Biblioteca do IES Pedro Floriani, de Redondela (Pontevedra) podemos ver como un centro educativo aproveita e enriquece esta iniciativa, con propostas dos diferentes departamentes, desde a súa convicción de que "toda profesora, todo profesor é profesor/a de lectura". A información sobre a actividade no centro, por mor da presenza da "maleta de lectura" é de gran interese.

"Ler e escoitar", en banda deseñada

Velaquí a visión de Lucía Martínez, alumna do IES Sánchez Cantón (Pontevedra), sobre o proceso de participación no concurso de Lectura en voz alta, LER E ESCOITAR, no que varias compañeiras súas chegaron á fase final e mesmo unha delas, Clara, acadou o segundo premio na modalidade individual da súa categoría. Lucía emprega unha ferramenta dixital para a creación de banda deseñada, que están aprendendo a utilizar no seu centro, bitstripsforschools e que ao parecer, dá moi bos resultados.

Xogar e ler en Educación Infantil

Un bo exemplo de como o alumnado de ensino infantil vai adquirido autonomía persoal na súa selección de lecturas, de como é quen de facer os seguemento das súas lecturas... O documento procede da Escola de Educación Infantil Barrionovo-Pastoriza, de A Coruña.

Ler matemáticas

As bibliotecas escolares apoian ao profesorado de todas as áreas de aprendizaxe no seu labor de formar lectores competentes. Tamén cómpre aprender a ler e a escribir en matemáticas. Un bo exemplo é este da biblioteca do IES Alexandre Bóveda (Vigo, Pontevedra) que convoca, xunto co Departamento de Matemáticas e no contexto do Plan Anual de Lectura, o II Concurso Matemático, un certame de resolucións de problemas matemáticos de enunciados "longos", que cómpre ler con estratexia e atención. Xúntase este ano unha nova iniciativa: un concurso de relato matemático. Toda a información no blog da Biblioteca IES Alexandre Bóveda.

Miguel Hernández, unha experiencia de lectura compartida

Nas bibliotecas escolares galegas pasan cousas coma estas. CPI O Progreso (Catoira, A Coruña): unha actividade de fomento da lectura da que son protagonistas os rapaces e rapazas de 4º Curso da ESO e as nenas e nenos de Infantil. Os grandes len a Miguel Hernández, os pequenos escoitan e debuxan... O que cada quen leva consigo desta experiencia ¿quen o contabiliza? Pero hai alguén que se atreva a dicir que "non pasa nada"???? Experiencia de lectura para outros, experiencia de atención que se dá e se recibe, intercambio de palabras, de imaxes e de afectos, vínculo... ou sexa... formación lectora. Parabéns ao profesorado implicado por esta iniciativa e a tod@s @s nen@s participantes.

O soldadiño de chumbo

Velaquí unha adaptación do conto de Andersen aos novos formatos dixitais levada a cabo por Xabier Senín a partir da multipremiada curtametraxe animada feita por Continental Producciones e Algarabía Animación. Os deseños son de Alfonso Costa, a música de Emilio Aragón e as voces de Manuel Manquiña e Luis Piedrahita. A ambientación está feita no Museo do Xoguete de Allariz.